股海實戰： 炒家埋位兗煤鑊氣夠

一一年首個交易日，港股高收，期望預示一年走勢高開高走，迎接豐盛之年！

每年初都係投資者談論股市「一月效應」嘅時候，此論主要針對美股，大意係指股市一月升，全年皆升；一月跌，全年皆跌。之不過，呢個「效應」非萬試萬靈，就如去年美股一月下跌，但全年計則上升。當然，去年美國經濟所遇到的大衰退乃前所未有，傳統「一月效應」亦要打個折扣。

套用喺香港，中國人好重視「頭」，希望首月股市開個好彩頭。由於今年農曆新年喺二月初，照計若然要炒上，班大帝好大機會喺一月動手，否則二月初更加難炒得起，是否如此，不妨等着瞧！

回說昨日市況，值得一提嘅係，往時收租股與地主股表現多數係同步，即升就一齊升，跌就一齊跌。不過，自從特區政府推出一系列措施打擊樓市炒風，地產股股價進行大調整過後，至今未見有太大嘅反彈動力；反觀喺預測今年通脹壓力升溫、租金趨升之下，收租股股價卻紛紛走強。

但說到底，樓價走勢唔會與租金表現背道而馳。故此，若然一月市況真係重現升勢，不排除係由地產股發力追落後所帶動。睇好大市嘅投資者，可以早做部署。

呢幾日花咗唔少篇幅講今年股市目標，但尚未提及支持位。事實上，今年股市變數甚多，投資者樂觀之餘亦必須注意下行風險，估計今年恒指低位介乎21,000至21,500點水平。

海信科龍醞釀破頂

除咗收租股之外，昨日和黃（00013）係表現最佳嘅藍籌股，皆因公司宣布收購包括香港國際貨櫃碼頭等資產，股價即升逾半成。中資股方面，汽車股遇壓，長城汽車（02333）急挫7.9%、東風集團（00489）及廣汽（02238）同跌逾2%。與其博汽車股反彈，阿莊寧選家電股，其中海信科龍（00921）正醞釀破頂，可以睇位跟進。

全球最大嘅煤炭出口基地——澳洲昆士蘭州最近受到洪水影響，水淹令煉焦煤付運受到阻礙。澳洲政府預期未來一周水淹情況仍會持續。由於中國乃澳洲出口焦煤嘅大買家，在進口量供應出現不明朗因素之下，炒家有意乘機煲起煤炭股，昨日已見動靜，神華（01088）、中煤能源（01898）及兗州煤業（01171）股價均以高收作結。

講開兗煤，最近公司擬向澳州兗煤增資，以協助該項目降低負債，並乘機增持煤礦權益，大行普遍睇好交易，並相信此舉有助加快兗煤澳州實現海外上市嘅步伐。昨日兗煤收報24.55元，距離五十二周高位25.25元並不遠。乘煤炭股有鑊氣，加上本身有新投資消息支持，目標突破26元關，跌穿23.5元止蝕。

戰報

雷士照明（02222）

上周二阿莊推介雷士照明時，低位只有3.9元，昨日股價一度高見4.35元，股價果然做好，累積升幅11.5%。

長城科技（00074）

上周四冼金基指長城科技呈買入訊號，昨日一度升上4.25元，以推介當日低位3.82元計，累計升幅逾11%。

\