鄭海泉為中大揭新頁
早前抱恙嘅鄭海泉，今日會喺一個公開場合現身，邊個咁大面請到佢光臨？咪係由新世界發展（00017）興建嘅全港第一間教學酒店，人稱彤叔嘅鄭裕彤都會親自主持開業儀式。
舊年鄭海泉請咗兩個月病假，但喺舊年十月，佢好畀面出席一個公開場合，咁啱又係同中文大學有關。事緣滙豐保險及中文大學齊齊辦保險課程，鄭海泉唔單只係滙豐中國董事長及滙豐台灣區主席，佢亦係中大校董會主席，雙重身份，冇得推辭喇！當時太子見佢精神相當唔錯，但就清減咗，今次又再畀面中大，證明佢身體無事啦。
新世界建教學酒店
太子知道，呢間全港首創嘅教學酒店，為本港酒店及旅遊管理教育揭開新一頁。教學酒店由新世界發展興建，分為酒店設施及教學設施兩部分。酒店部分由凱悅國際集團管理，面積達五萬平方米。