李小加獲授股行尾運

港交所（00388）上個月中宣布撥出1.213億元作為僱員股份獎勵計劃，其中720萬元會購買股份獎授行政總裁李小加作為長期獎勵，以當日港交所收市價每股183.2元計算，大約可以買入3.93萬股。不過，尋日聯交所資料顯示，李小加申報喺去年最後一個交易日、即十二月三十一日，增持咗港交所4.0856萬股，以當日港交所收市價176.3元計算，涉資大約720萬元。

太子唔知道係李小加定係聯交所決定喺去年十二月三十一日「出手」，但就係因為遲咗半個月「出手」，李小加可以買多千幾股港交所。唔好睇小呢千幾股港交所，以尋日收市價179.8元計算，足足相當於27.9萬元。更重要嘅係，若李小加喺上月中「出手」，尋日都仲要輸錢，但等到去年十二月三十一日「出手」，即日賺14萬元，唔知李小加下個月派利是會唔會爽手啲呢？

葉志衡三月離任

講開港交所，近年都有好幾個高層離職，佢哋尋日公布，集團副營運總裁葉志衡已決定辭職，以轉職往投資管理行業發展，而為方便工作上嘅交接，將响三月底先離任。葉志衡唔經唔覺喺港交所做咗超過七年。