股海實戰：兩儀控股醞釀大動作

聖誕假後首個交易日，金魚缸果然「快落」，恒指曾低見22,529點，收報22,621點，跌212點，成交僅400多億元。繼續買賣兩閒，皆因班大戶仍在休假當中，少咗呢班大孖沙入場，除了部分內銀股成交較大之外，指數股交投淡靜，睇怕大家要多捱幾日悶市。

內地股市持續探底，滬綜指尋日再跌48點，收報2,732點，但明顯可見，滬、深兩市主板總成交額同樣萎縮。股類方面，汽車、內房、煤炭等股份普遍受壓，黃金、部分機械、醫藥股則逆市走強。投資者正在消化央行指「把穩定價格放在更突出位置」嘅言論，一般估計明年內地尚有兩至三次加息行動，估計喺投資者收拾心情重新入市前，市況會維持反覆偏軟。

上市不久即傳來大股東押股借錢嘅博士蛙國際（01698），昨日股價受壓，低位見5.53元，收報5.69元，跌11.51%，成交1.2億元。老實講，雖然呢啲只係大股東個人嘅財務安排，但講到底消息屬於負面，所以唔建議投資者沾手。講開半新股，上周四才掛牌的亨鑫科技（01085），上市首日股價即潛水，估計街貨有限，2元樓下值得留意。

一如阿莊所料，汽車股已普遍出現超賣情況，反彈隨時出現，昨見廣汽（02238）重上10元關，收報10.2元，升4.94%；華晨中國（01114）逆市靠穩，收報 5.46元，升0.92%。不過，呢轉跌浪，汽車股真係幾傷，跌到咁上下博反彈唔係唔得，但最好都係走即日鮮，以盡量降低風險。

交投明顯有改善

此外，昨日一隻逆市上升嘅異動股乃兩儀控股（00094），曾抽上全日高位2.56元，收報2.5元，升0.02元，交投明顯轉活，成交1,069萬元。

早在○七年，兩儀透過收購GRHL60%股權，進軍林木砍伐、木材加工、林木及木材產品嘅市場推廣及銷售業務，變身成為一隻林業股。今年六月，公司與主要股東嘉漢訂立股份認購協議，令後者成為控股股東，嘉漢已委派三名人士加入兩儀董事局，其中一名就係財技了得嘅前藍籌大班馬世民。

上月初，公司表示可能獲控股股東轉讓新西蘭一種植場嘅權益，惟交易尚未落實。同月，公司發出通告，擬將公司易名為「綠森集團」，以反映主營業務，同時建議更新發行及配發新股嘅一般授權。雖然攞定股東permit等時機一到可以快速做「批盪」係上市公司一般做法，但既然公司上月已透露有新收購對象，加上近日股價及交投有改善，不排除真係有心做嘢，且看短期有關轉讓新西蘭林業項目是否有進展。

以控股股東增持價1.8至2.2元計，下行風險心裏有個數，一旦大成交衝穿52周高位2.8元，可望打開新局面，實在值得留意。

戰報

海爾電器（01169）

上周一阿MAY推介海爾時，低位只有8.12元，昨日一度創9.1元新高，累積升幅12%，果然眼光獨到。

六福集團（00590）

昨日Sammi指六福有力再彈，昨日下試23.4元低位後顯著回升，並一度升上24.5元，單日升幅已有近5%。