近半散戶今年炒燶
二○一○年就快完結。本報網上調查過去一周共訪問571名散戶,結果47.1%散戶炒輸,能夠賺錢的就有37.3%,其餘15.6%就打和,可謂輸多過贏。證券界人士亦表示,總結今年市況,下半年市況轉差之下,今年股市絕對難玩。
欠方向 贏錢靠短炒
僑豐證券業務發展董事連敬涵稱,今年股市絕對難玩,大部分投資者都是輸多贏少。他表示,首三個月大市表現較好,下半年開始轉差,期間市場還一度以為恒指升至25,000點高位後,仍能保持升勢,及至後來跌逾2,000點,大部分散戶都跌入陷阱,倒蝕收場。
散戶梁女士今年在股場上獲利近四成。她指近月大市波動,全憑看準時機趁低撈貨,成為賺錢必殺技。
散戶樊小姐亦說,全年靠短炒賺近7萬元。她說今年大市欠方向,又難捉摸。她說:「如果唔係成日睇住都玩唔到,無勤力做功課根本搵唔到兩餐!」
散戶Polly同樣在股場上獲利,她表示主要靠抽新股。她直言年尾抽到兩手博士蛙(01698),賺近五成。
散戶心聲
已經跌夠
盧先生:「我估唔會跌好多,跌咗咁耐都夠晒皮啦!我估全年收22,400點啦!」
見二萬二
陳小姐:「我覺得個市再會落番啲,去到22,000邊應該有支持!」