短炒倉：JOYCE 又係翻炒時候
人行突然宣布加息，昨日內地A股明顯受壓，相信今日港股復市，都難望有運行。不過聖誕期間，無論志強去到商場定係消費場所，所見到處都係人頭湧湧，即時諗到調整咗接近成個月嘅零售股，應該係時候重新留意。
志強九月底推介JOYCE（00647）之後，股價有如坐火箭，最高炒到上1.1元樓上，本月以來持續整固，上周五逆市反彈5%，收報0.84元，似乎調整已完成。
當然，相對今年年頭，JOYCE現價仍翻了三番，難免有人會畏高，但集團截至九月底止中期盈利大增9倍，每股盈利0.025元，下半年有「十．一」同聖誕新年等消費旺季，盈利無可能差過上半年，以全年每股盈利0.06元同12倍市盈率嘅保守預測，估值都已達0.72元，加上截至九月底每股持現金約0.23元，等於0.95元，可見在消費旺季收入豬籠入水下，現價已有翻兜價值，目標1元，止蝕0.79元。
