股海實戰：雷士照明展現龍頭實力

這個聖誕天氣與股市氣氛一樣冷，節前港股半日市，成交冷清，萬料不到聖誕佳節人行宣布加息，加上溫總再次強調樓價將回落至合理水平，內地A股昨日應聲走低，滬綜指失守2,800點收市，月底前港股依然係易跌難升。

今次人行加息時間予人有點突然，但加息這個舉動卻喺預期之內。有指加息行動係針對樓市及通脹，但阿莊反而認為，央行喺下月國家主席胡錦濤訪美前再度加息，實乃中美雙方一早達成嘅共識，而選擇喺長假期間加息，係讓市場有足夠時間消化。

各個板塊之中，也許保險股某程度較能受惠息率趨升，但高負債的股份，如航空股則會遇到沽售壓力。上周暫得喘息嘅東航（00670）、南航（01055）及國航（00753），本周或要再下試低位支持。

汽車股持續受壓，上周五東風集團（00489）及華晨（01114）分別急挫逾7%，廣汽（02238）、吉汽（00175）及長城汽車（02333）跌幅介乎4至6%。有指是由於北京推出「史上最嚴厲」嘅治堵方案，以解決交通擁擠嘅問題，限制上牌措施將影響明年汽車銷售市道。不過，上海、深圳等城市已表態暫無意效法北京，短線出現反彈行情也不出奇。

講到明年嘅投資展望，中央推動節能減排力度加大，相關環保股可以受惠，其中LED產業前景備受看好。本月中，摩通便就LED股雷士照明（02222）發表報告，指該股貴為內地最大嘅本土照明品牌供應商，憑藉本身的完善分銷網絡，業務可望維持高增長及高毛利率，建議增持該股，目標價5.3元。

維持高增長步伐

事實上，在上月底內地多個部委聯合組織開展LED照明產品應用示範工程，獲選入圍嘅28家企業中，雷士便成為唯一的榜上有名嘅香港上市公司。正由於市場需求大，愈來愈多中小企業加入這個行業，產品質素及售價高低差別大，行業對於官方制訂國家標準嘅訴求愈來愈高，一旦落實行業標準，將更有利類似雷士這類龍頭企業嘅發展。

上周五，雷士股價逆市上升，高位4.01元，收報4元，升3.09%，成交達1.84億元，翻查紀錄，有約四十球成交股數為大手上板，係咪大炒前嘅倉位部署，不得而知，但純睇走勢，過去三個多月一直守住4元關，入市策略可先買第一注，升穿4.5元後再加注，跌穿3.5元就止蝕。

順帶一提，持倉中嘅中燃（00384）傳來噩耗，指兩名高層被兩位自稱「深圳市公安局」嘅人士帶走，公司已即時委任董事及成立臨時管理委員會，確保營運。缸邊消息話事件與早前收購中裕燃氣（08070）有關，實情如何仍有待正式公布。遇上咁嘅情況，真的不幸！

戰報

天津發展（00882）

本月七日冼金基指天津發展具注資憧憬，當日低位5.94元，上周五股價創7.2元一年新高，累計升幅逾21%。

東岳集團（00189）

上周一積奇指東岳前景值得看好，周五股價一度升上4.93元，較推介當日低位4.52元，累計升逾9%，果然眼光夠準！

\