市場徐想：霸王 密謀捲土重來
霸王（1338）喺舊年成功上市，仲一度成為「凍資王」；夾住強勁嘅聲勢，佢嘅股價仲曾經喺一年之內高飛到6.3元水平。可惜好景不常，自從今年七月霸王傳出旗下洗頭水含有可致癌物質二惡烷以後，股價就拾級而下。
但霸王作為內地洗髮水市場嘅旗艦，又點會咁經唔起風浪？據市場消息指出，霸王目前手頭現金仲有差唔多15億元人民幣；而且有分銷管道調查顯示，霸王洗髮水嘅銷售情況已經去番危機爆發前嘅大約60%水平。
霸王亦不斷致力開拓新產品，包括重金禮聘「宇宙最強」紅星甄子丹做佢旗下霸王涼茶嘅代言人。據某大行引述霸王管理層指出，預期涼茶業務會喺年底達致收支平衡。
昔日西楚霸王喺烏江自刎，若果佢當時能夠放低自尊心，可能有機會捲土重來。如今，霸王集團同樣在四面楚歌之時，未知各位「江東父老」會否再一次畀機會佢呢？