期指攻略：失守22782 將重拾跌浪

尋日港股早市波幅只得100點左右，唔少人會以為假期前，大局已定，殊不知下午內地股市收市後，香港魚缸方見真章，恒指跌穿23,000點後，一度連22,900點也告失守，最終收報22,902點，跌142點，10日線22,985點又再得而復失，成交只得439億元，係七月中以來的最低紀錄。

內地A股早於周三已見回吐，本身缺乏正面消息的港股，頂得一時唔頂得一世，尤其備受內地收窄銀根政策困擾的內銀H股，無辦法長期與弱勢的內銀A股走勢背馳，君可見昨日跌市，恒指成分股中，內銀及保險股貢獻的點數跌幅唔細，成為昨日跌市的火車頭。

技術指標準確度降

大市成交疏落，技術指標的準確度也相應降低，但後市不宜再跌穿22,782點，否則本周初的回升，將被視為中期跌市的一次反彈而已，明年初要扭轉中期調整浪，先決條件係要恒指升穿23,612點及23,866點這兩個重要阻力。

筆者的23,200點行使價馬鞍式期權短倉，昨日認購及認沽的期權金收市分別為68點子及375點子，合計期權金只係比前日回升23點，去到443點。計埋今日的半日市，距離本月結算只剩三個半交易日，時間溢價損耗料會加快，筆者仍會靜待收成。