Fundman睇市：瑞聲聲學大發iPhone財

尋日港股悶咗一個上晝，但去到臨收市前一個鐘頭，恒指竟好似倒水一樣，連破20日及10日平均線，收市跌142點，報22,902點，但成交去到接近五個月低位，得439億元。

老早預咗十二月份會難捱，一來並非業績期，市況唔就IPO都靜晒，加埋唔少基金經理放假，惟有睇住無聖誕假放的大陸股市做人，可惜十一月人民銀行打晒開口牌，話內銀全年貸款額度所餘無幾，意味着中資公司班水回朝的趨勢極可能持續，君可見美電抽番上7.7796，重返八月底高位，資金繼續有流出迹象，加埋A股周三已經有小小腳軟情況，試問港股何德何能，可以自己頂住喺23,000點樓上？

聖誕佳節臨近，史提芬做咗個非正式統計，問問身邊朋友今年最想收到甚麼聖誕禮物，結果一啲都唔令人意外，iPhone4大熱勝出，唔少未有的朋友，都話想收到一部。

蘋果公司嘅Steve Jobs真係厲害，搞到全世界人中晒iPhone、iPad毒，尋日睇睇，市值接近3,000億美元，已進一步拋離上個世紀壟斷個人電腦市場嘅微軟（市值2,400億美元）。

筆者唔係想在此為Steve Jobs歌功頌德，但iPhone4在電子產品市場的受歡迎程度，未必後無來者，但肯定係前無古人。出生於六、七十後，應該仲記得八十年代Sony的Walkman一樣令消費者瘋狂，但對比iPhone4，一個大量生產的商品，居然面世近半年，依然長期缺貨，的確是相當罕見。

半年股價近翻一番

iPhone4的流行，除了為蘋果公司帶來可觀進帳外，亦同時惠及不少上下游公司，以台灣股市為例，唔少零部件供應商都成為受惠者。至於港股市場，其實亦都有這類公司，好似為iMac及iPhone供應微型喇叭的瑞聲（02018），今年股價累積就升咗七成三，跑贏大市一條街，尋日仲要逆市升1.15元，報22.2元，距離歷史高位22.95，只係幾毫子。買部電話，一年半載好自然轉款兼跌價，但半年前走去買瑞聲，當時不過12元左右，今日差不多翻一番。

瑞聲專攻微型喇叭，一條龍提供設計、製造到系統解決方案，產品主要應用於移動手機、遊戲機控制搖桿、筆記型電腦等電子消費品，公司積極避開競爭激烈的中下價零部件市場，相對地願意投入科研，主力開發高檔產品，故客戶名單中，全屬有名的電子消費品品牌，包括諾基亞、蘋果公司、Research in Motion及摩托羅拉等。

拓新業務值得期待

電子消費品企業競爭激烈，為防洩密，像蘋果公司一類，一般對零部件供應商供貨內容，要求絕對保密，當然分析員可以從其他途徑，得到資訊，由上游公司的技術專利註冊，到供應商的生產線調配，都可以大致估計到未來一至兩季的接單情況。瑞聲早前曝光的首三季業績，純利及營業額同比分別升69%及52%，達6.6億元（人民幣．下同）及22.9億元，綜合分析員估計，與iPhone4大賣，高毛利定單上升，不無關係。

智能手機及LED電視等高精密電子產品市場持續發展，瑞聲借聲學產品的成功經驗，準備染指光學模件市場，年初收購晶圓級玻璃模塑技術，另外投資一間歐洲消費相機的閃光燈及閃光模組公司，憑藉和全球幾間主要流動通訊供應商的關係，這方面的發展相當令人期待。