股海實戰： 北控水務供股有着數

假期前夕，金魚缸人氣急降，港股尋日成交降至只有400多億元，真係靜到發慌﹗恒指在缺乏承接下，午後跌幅擴大，結果回落至23,000點樓下收市，報22,902點，跌142點。

值得一提，昨午農業銀行（01288）遭大盤質低，大部分喺3.86元成交，全日低位3.84元，收報3.86元，跌4.22%。要搵沽壓源頭亦唔難，事緣有內地傳媒報道，人行擬建立新嘅管理信貸規章，並將納入資本充足率作為評量標準。換言之，若新制落實，日後可能係根據每家銀行本身嘅資本充足率等各項因素作為審批指標，以調節信貸分布。

根據大行分析，若然新制實施，農行及中信銀行（00998）所受嘅影響最大，難怪農行成沽售對象，而中信行股價由上月高位6.26元，反覆回落至本周初低位4.84元，累計跌幅22.6%，似乎二者股價下挫，實非偶然。

中央農村工作會議已經完結，據講會議重點係研究加快水利改革發展問題，而明年中央「一號文件」嘅主題就係推動農村水利建設。

講到「水」，又令阿莊聯想起水務股。昨日北控水務（00371）復牌，冷不防係宣布2供1供股計劃，供股價1.485元，集資金額33.9億元。同時，公司宣布與母公司北京控股（00392）就注入資產建議訂立排他性協議，一旦落實注資，將根據公開發售按相當於較每股股份理論除權價折讓15%嘅發行價，發行代價股份嘅方式支付。

今次母公司包銷供股，而集資過後將有助減輕利息支出（截至六月底公司資產負債比率由去年底嘅0.58上升至1.28），故雖然今次供股價較停牌前價格折讓46%，但昨日復牌後股價硬淨，高位做2.88元，收報2.86元，升4%，成交1.18億元。

街貨量減有利炒作

假設母公司僅須按比例供股，供股完成後其持股量將維持於43.73%，但若須全數履行包銷協議，則持股量最高可增至62.49%。老實講，阿莊有感過去此股炒起來一直有顧忌，可能與街貨量有關，若然今次透過供股及注資，母公司能進一步鞏固控制權，相信有利冇害。

再參考北控嘅中期業績，上半年來自污水處理及水務業務嘅除稅後溢利為1.53億元，其中分佔北控水務嘅利潤額為8,078萬元，而應佔第九水廠自來水特許經營權溢利約7,250萬元，以此推算，嚟緊向北控水務嘅注資規模金額估計約18億至20億元。

提到大折讓供股，又令阿莊想起早前提及過嘅志高（00449），同樣係大折讓供股，之後股價如坐直升機般，一浪高於一浪，最近又宣布送紅股，小股東笑逐顏開。今次北控水務會否成為翻版，暫時然未知道。不過，睇落呢隻股票 發展趨勢向好，照計供得過呢！

戰報

立信工業（00641）

阿莊上周五推介立信工業時，低位只有4.35元，昨日股價一度高見4.83元，累計升幅11%，真係唔講得笑。

巨騰國際（03336）

積奇本月十五日建議短炒巨騰，當日低位只有3.28元，昨日股價高見3.9元，不足兩星期累計升幅約達19%。

\