梁高美懿聖誕做DJ
恒生銀行（00011）「女大班」梁高美懿自從上任以來，一直都致力同員工打好關係，除咗喺內聯網寫Blog、喺內部通訊內分享個人經歷同感受之外，最近佢就化身做DJ，藉《晨早廣播》同員工賀聖誕。
藉《晨早廣播》送祝福
恒生每朝開工之前，都會喺公司內播放《晨早廣播》，內容主要係最新嘅銀行、社會資訊，又或者重申員工重要守則等，亦都會為員工送上康樂活動嘅資料。今次梁太就趁住聖誕佳節，藉住呢個空中平台為員工送上節日嘅祝福，仲點播《White Christmas》（白色聖誕）畀員工聽，叫大家趁住假期，放低工作，陪伴家人共度佳節。
梁太有溫情嘅一面，亦有剛強嘅另一面。佢被英國《金融時報》選為「最傑出商界女性」，榜內人物雖然只係子公司嘅高層，符合唔到該報「全球商界女性50強」嘅條件，但肯定嘅係全部都係所屬領域嘅精英。
梁高美懿化身做DJ賀聖誕。