股海實戰：物極必反恒鼎可博反彈

恒指全日高低波幅僅約169點，如此悶局，整日齋坐喺金魚缸面前恐怕會變「化石」，最怕係睇市睇到冇晒感覺，到真正出現入市機會嘅時候，分分鐘唔識得作出反應，所以都係選擇下晝出去行吓街，辦吓佳節禮品及年貨。一年炒到晚，也應懂得暫時放低一下，養精蓄銳，等明年再戰！

近日市場盛傳內地將上調油價嘅消息成為事實，發改委宣布，自昨日起將汽油、柴油價格分別提高每噸310元及300元人民幣，但由於本周以來油股表現偏強，某程度已反映此消息，故見昨日未有太大反應，中海油（00883）及中石油（00857）分別只升0.6%及0.3%，中石化（00386）高開後最高見過7.49元，收7.39元，升2.35%。

近日消息多多嘅非凡中國（08032），昨現大幅反彈，至下午中途停牌前，高位見0.39元，收報0.37元，升幅23%，據講有待澄清報章報道。阿莊都係嗰句，雖然呢隻股價細利炒作，但亦只能看待成極短線嘅炒賣對象，實實在在進行投資嘅話，抄底宜從李寧（02331）入手。昨日李寧股價升2.48%，收報17.36元。

正所謂「物極必反」，分別只在乎時間長短，即使係股票價格處於下降走勢，亦總有反彈嘅時候，「吊頸都要抖抖氣」。好似隻煤炭股恒鼎實業（01393），股價由上月十一日見高位9.02元後，反覆回落，連現十九支陰燭後，本月九日曾作反彈，但翌日再跌，至本周一低見6.07元後始回穩，昨日一度重上10日線（6.39元），高位見6.46元，收報6.37元，升4%，成交2.05億元，平均成交價6.326元。

產量減少助煤價企穩

恒鼎連跌多天，主要係貴州省於上月公布「關於取消整合、技改煤礦保留一套獨立生產系統的通知」，即自本月底起，全省將取消整合、技改煤礦保留一套生產系統嘅政策，所有整合、技改煤礦需要如期、安全完成建設工程，盡早通過驗收，持證生產。

恒鼎喺貴州省共持有20個煤礦，其中有6個煤礦擁有上述通知內所定義嘅舊生產系統，預計該等煤礦嘅新生產系統將自明年四月起至後年六月期間分批正式投產。經計及相關影響後，恒鼎已經將明年原煤生產計劃作出調整，產量目標由原有550萬噸減少約60萬噸，降幅大約11%。

阿莊認為，受相關政策影響的不獨恒鼎，估計明年全國原煤總產量亦會受到影響，產量減少有利煤價企穩，有助抵銷產銷量下降嘅影響。

上月中旬以來，恒鼎市值最多蒸發60億元，負面消息已反映，料短線股價可喺6元邊喘穩，若突破10日線6.39元，可上試6.8至7元阻力位，穿6元止蝕。

戰報

環能國際（01102）

錢進上周一推介環能時，當日低位只有0.38元，昨日股價顯著做好，並一度高見0.425元，累積升幅有11.8%。

勵晶太平洋（00575）

Sammi上周五指勵晶太平洋買盤強勁，昨日股價高見0.43元，較推介當日低位0.385元，升11.6%，果然眼光夠準。