中資紐約買地標名廈

中國企業嘅影響力又再向海外延伸，根據《華爾街日報》所講，紐約華爾街附近，一座地標式建築物，最近由一家中國嘅建築公司以1,800萬美元，即1.404億港元買入。前業主係由馬赫西所創立嘅基金Global Country of World Peace（GCWP）。

馬赫西係邊個？佢係披頭四樂隊嘅「心靈導師」、印度超覺靜坐嘅發起人。超覺靜坐喺上世紀五、六十年代風靡咗唔少西方人，除咗披頭四之外，其他名人信眾包括美亞花露、大衞連治等。

披頭四導師基金放貨

講番今次單刁，GCWP負責人話，由於營運呢座名為The American Bank Note Building嘅成本太高，所以將佢出售。睇番紀錄，GCWP喺○四年以550萬美元買入，依家持貨六年帳面賺1,250萬美元，盈利率可以話係倍增。

呢座大廈樓高五層，外表其實都幾古色古香㗎，花崗岩外牆、新古典式設計，正門兩條三層樓高嘅希臘式石柱相當有氣勢。樓面超過15,000方呎，頂樓有三個行政人員級嘅住宅單位。