渣打報答員工又唱又食
為咗酬謝同事們今年來嘅辛勤工作，前日渣打特登喺會展連開160圍，請咗2,000位分行嘅前線同後勤同事，渣打香港區個人銀行業務主管禤惠儀、唔少分行嘅區長同經理都有捧場，實行與眾同樂。
太子向朋友八卦吓當晚情況，點知佢嘅回答係「聽出耳油」。原來渣打以「演唱會」作為當晚主題，所以唔少員工粉墨登場，獻唱「貓王」、梅艷芳、陳寶珠等嘅首本名曲，即使請來真正嘅歌星表演，為佢哋伴奏嘅樂隊都係渣打員工。
全場鼓掌謝服務經理
朋友仲話，當晚渣打有個特別安排，就係全場一齊起身，為在場嘅眾多分行服務經理鼓掌，場面可謂非常感人。講起客戶服務，大家可能諗起前線嘅服務員，其實分行服務經理係幕後無名英雄，當前線一有需要，佢哋就要提供支援。
渣打已經唔係第一年搞咁大型嘅周年晚會，太子相信，呢啲周年晚會唔單止係食吓、玩吓咁簡單，更深層嘅係促進員工彼此間感情、增加對公司嘅歸屬感。
前日渣打特登喺會展連開160席，請咗二千位分行嘅前線同後勤同事。