期指攻略：向上重要阻力 23325

前日期指穿22,400後拗腰回升，更罕有地以高水收市，筆者已指出，大戶殺倉活動可能已近尾聲，尋日港股基本上是前日午市之延續，加上內地AB股均見粉飾窗櫥活動，恒指由頭升到尾，收市升354點，報22,993點，和10日平均線阻力23,016點，只差毫釐。

筆者估計期指只要重返22,755樓上，大有機會逼近23,000水平關口，估唔到整個反彈一日之內搞掂。以現貨指數計，今浪由23,612點起步，跌到前日最低的22,392點反彈，0.5的跌幅阻力在23,002點水平，只要收市指數企穩水平之上，短期調整可望暫告一段落，向上較重要阻力在23,325點附近。

事實上，本星期只剩兩個半交易日，連同下星期三日半市，夾埋得六個交易日就要同一○年講拜拜，外圍的情況未算太差之下，大戶假期前見好就收，都係預期之內。

期權短倉食胡在望

好在前日將淡倉平掉，否則來回四日恒指U形回升，又一次見財化水。目前手上尚餘23,200點馬鞍式期權短倉，23,200點認購收市價129點子，23,200點認沽則仲有355點子，以前星期短倉收取820點子期權金，帳面利潤336點子。經過昨日連破多個上阻力，筆者對結算價接近23,200點的信心加強，希望今日聖誕前後，收爐倉可以順利賺到盡。