Fundman睇市：南方航空宜避之則吉

前日港股殺穿22,400點，大批「牛仔」被宰殺後，大戶趁靜市殺倉殺得七七八八，昨日港股粉飾櫥窗的姿態都算明顯，借內地股市反彈1.8%，恒指一度重返23,000點樓上，收市報22,993點，升354點。連續幾日外圍做好，港股應升唔升的烏氣一掃而空，無奈成交唔多，得605億元，除咗基金年底埋單條數好睇些少之外，對後市啟示作用唔大，相信年終點數在23,000至23,450點之間作結的機會相當大。

今年，中港股市都算令人跌眼鏡，○九年祖國成功保八後，今年經濟像全速開行的火車頭一樣，唔單止無停低，仲愈走愈快，估計全年經濟增長會達到10.5%，奈何滬綜指年初至今不升反跌，累積11.4%跌幅，全球股市排最尾幾名，港股雖然唔使跌，但都唔好得幾多，暫時得5%進帳。

展望一一年，企業盈利增長預期仲係相當樂觀，國企及中資股業績預測可以有一成至一成四的增長，到底股市與經濟表現持續背馳的情況要維持幾耐？如果信官方預測通脹到第一季見頂，人行的緊縮政策可能維持到第一季尾第二季初，估計股市發威的時間，亦都會好接近人行再開水喉之時。

歐洲股市見承接力

上星期穆迪送聖誕禮物畀西班牙，將其國債評級列入觀察名單，到尋日輪到葡萄牙收禮物，其短期國債評級被穆迪列入觀察名單，評級可能被降一至兩級，不過歐洲股市的反應出奇冷靜，執筆之時，英、德、法股市全部錄得升幅。市場解讀，認為西葡國債CDS溢價早已揚升，穆迪警示亦早已在投資者預期之內，由股市的正面反應，可見歐洲市場對歐元區的壞消息承受能力都幾高，似乎係牛市開始嘅好現象。

火燒冷灶，三大航空股尋日升幅介乎1.6至3.3%，第三季航空股表現的確教人喜出望外，四月時筆者仲嫌南航（01055）已大幅高於歷史市帳率，認為估值有被高估之嫌，勢估唔到，八、九月股市炒美國QE2及人仔升值，航空股短短一季股價翻了一番，表現遠超預期。

一直唔明，股市點解會將外債（相對人民幣）貶值帶來的兌匯收入，填補差強人意的經營損失，視為航空股業績預測一部分，即使信這一套，近期人行由寬鬆走向審慎的財政政策，人民幣升值預期開始降溫，以公眾的解讀模式，航空股似乎是應該避之則吉。

南航一○年集各項利好因素於一身，全年大部分時間航油價格低企，經濟強勁推動搭客量，載運率處於高峰，加上九月份人民幣升值的額外「獎勵」，大行預期業績會達到44.1億元（人民幣．下同），對比過去五年絕對是輝煌的紀錄（依次是蝕18.4億、賺1.8億、賺18.4億、蝕48.2億及賺3.3億元，波動到暈），預期市盈率得7.5倍。

利好因素逐步消失

低廉估值當有成因，航油價格回升，新投入航機令載運率由高峰回落，加上人民幣升值被過分炒作，幾個有利因素可能在一一年逐一遠離航空股，在增長引擎失去動力下，南航盈利高峰可能一瞬即逝。

南航歷史市帳率三倍，估計全年業績出來之後，會降至1.5倍左右，但比過去十年中位數1.19倍，仲有兩成六溢價，筆者估計，未來半年南航股價重返年中的起步位，即3.5元左右，市帳率回到中位數水平，應該唔會令人太過意外。