股海實戰： 魏橋紡織中線坐8望9

內地股市昨日喺內房股帶領下回揚，滬綜指重上2,900點樓上收市，帶動恒指亦一度反彈上23,000點樓上，收報22,993點，升354點，但成交仍然一般，僅599億元，期指轉低水33點。

喺基金粉飾窗櫥效應之下，全年計恒指或者有一千幾百點進帳，用「好過冇」嘅心態看待，希望在明年！

環顧今年藍籌股中，似乎最實際係跟進超人李嘉誠增持和黃（00013），見和黃股價由去年底收市價53.4元，反覆升抵上月高位86.3元，累計升幅最多達61.6%，明顯跑贏大市。不過，其實李超人最近仍在增持系內股份，上車有心唔怕遲，若然明年3G業務真係開始大豐收，和黃可爭取重登「紅底股」之列。

今年中國移動（00941）表現真係令人失望，去年底收市價72.85元，今年最叻見過84.8元，依家回落到77元水平。昨日內房股亦受A股氣氛帶動，雅居樂地產（03383）升5.6%、富力地產（02777）及保利香港（00119）同升逾4%。內銀股偏穩，保險股財險（02328）及平保（02318）分別升4.5%及3.3%。嚟緊基金經理做「Window dressing」，相信汽車、家電等國策股亦係對象之列。

中央農村工作會議即將召開，如何增加農產品供應，壓制價格上漲，成為重要議題。一般相信，中央將確保支持農村經濟發展嘅貸款有增無減，類似農機補貼等優惠政策亦會繼續執行，農業股具支持，阿莊持有嘅第一拖拉機（00038）昨日股價創五十二周新高9.05元，收報9.02元，升3.3%，對呢隻股嘅期望未有改變，會繼續持有。

中國燃氣靜候佳音

講到阿莊嘅持股，中國燃氣（00384）前日已停牌，有待宣布股價敏感消息，相信是福不是禍。今年首季買入嘅中航科工（02357），前日股價觸及低位3.39元後現反彈，昨日升勢持續，高位做3.76元，收報3.74元，升4.1%，排除業務有新發展嘅可能性，若然今次反彈唔返4元樓上，或要再試250日移動平均線（3.4元）支持，唔想再坐可以先走一轉。

此外，昨日紡織股魏橋紡織（02698）以大成交破位而上，高位做7.76元，收報7.55元，升12.69%，成交1.16億元。查實，相對於互太紡織（01382）等同類股，魏橋股價有落後之嫌，隨着行業景氣持續回揚，呢隻股具備追落後概念。

今年上半年，魏橋賺5.45億元人民幣，同比增長38%，相信全年計盈利可實現雙位數字增長，見到近期有基金喺場內減持，但股價慢火煎魚，未現太大沽壓，相信係「有人辭官歸故里，有人漏夜趕科場」，參考下半年嘅走勢，短線股價回吐只要守得住7元樓上，可以留意吸納機會，論估值中線股價可以坐8（元）望9（元），止蝕位6.7元。

戰報

中國秦發（00866）

上周三阿莊推介秦發時，低位只有4.33元，昨日高見4.76元，累積升幅近一成。

建福集團（00464）

冼金基上周四建議吼位買入建福，當日低位只有0.78元，昨日一度升上0.86元，累積升幅逾10%。

\