中動保賀上市送金雞
嚟到二○一○年底，今年本港新股上市嘅平台非常旺場，集資額仲創新高！而趕及年尾上市嘅仲有中國動物保健品（00940），尋日以介紹形式上市。本身公司業務性質都算新奇，尋日仲好特別咁送咗隻金雞畀港交所（00388）做紀念品添！
金光閃閃寓意勁賺
喺新加坡上市嘅中國動物保健品揀香港第二上市，原因都係想覆蓋到更多投資者，而且香港又接近內地，投資者對公司更加容易理解嘞。
公司主要係生產及銷售禽畜藥物，所以公司喺上市儀式上送畀港交所嘅紀念品都係動物，係一隻金雞嚟嘅，金光閃閃咁，仲話寓意希望大家都賺到盆滿缽滿喎！咁送隻雞都算幾特別嘅！因為平時上市都係送吓虎、牛等猛獸，寓意生生猛猛咁，太子真係好少見到送雞，不過呢個又係萬用解釋嘅，因為個個都希望發o架嘛！