恒生關穎嫺整愛心曲奇
聖誕節就到，太子見唔少跑夠數嘅銀行開始抖抖先，但恒生義工隊就冇停手，近排仲同小朋友齊齊整聖誕曲奇，預早玩定個開心聖誕節，信用卡及個人業務關穎嫺（Margaret）仲親自做埋裝飾品。
恒生義工隊今年「工作時數」都唔少，就算到年尾佢哋一樣未有放軟手腳，早前由賓卡變身做甜品師傅，同深水埗一班基層小朋友喺員工餐廳齊齊整曲奇。
Margaret平時做好條數就一定係高手，太子發覺原來佢砌靚啲甜品都非常掂，今次就同小朋友喺巨型聖誕薑餅屋上加自製裝飾，好玩過裝飾聖誕樹，佢話仲可以發掘埋小朋友嘅創意添。
義工隊做足萬七個鐘
恒生義工隊服務時數仲高到出晒名，不久之前先喺香港義工嘉許典禮拎咗上年私人團體最高服務時數獎，因為佢哋上年總共做咗1.7萬個鐘義工。
恒生關穎嫺（左）同小朋友齊齊整聖誕曲奇。