短炒倉：MI能源 值得捧場
志強嘅心水中盈國金（00766）上周五有好表現，升近一成，收報0.5元，目標0.54元應該有機會見到。乘勝追擊，今日嘅心水係新股MI能源（01555）。
近期幾隻新股上市後嘅表現都麻麻，上周二掛牌的MI能源亦不例外，雖然有女股神劉央撐場，但撞正港股調整，結果1.7元招股價亦未能守住，不過低位承接力強，股價稍作潛水後，上周五已迅速重返1.7元收市。
MI能源為內地少數的民營石油生產商，集團目前在吉林省擁有三個油田，每日產油約一萬桶，由於跟中國石油天然氣集團有生產分成協議，所有原油都會賣給中石油集團，扣除生產成本後按比例分成，業務模式簡單，只要油價持續向上，盈利亦可望同步增長。
在全球資金氾濫下，相信油價長升長有，加上集團上市後有機會進行收購，盈利可望進一步增加，現價買得過，目標2元，止蝕1.6元。
