期指攻略：缺乏方向 無謂落場

一○年進入最後倒數。上星期，筆者認識唔少的大行銷售部及研究部朋友，都開始放假去矣，港股少了這批大玩家的影響，除每日成交縮到600億至700億元外，亦都相當缺乏方向性，炒期指無論做好做淡，好容易畀人左一巴右一巴。

上星期五，完美演繹甚麼是炒家陷阱，大市走勢相當飄忽。期指早市上試22,710點不果，午後跌到22,490點，去到接近三個月低位，當人人深信淡勢已成定局，三時左右大市卻又再升穿早市高位，去到22,740點，但好友決心不足，最後破位亦無進一步攻上22,785點的阻力，收報22,672點，屬一個指標作用唔大、模棱兩可的收市點數。

上落市只宜大大聲細細注，臨近年底，今年贏輸大局已定，無謂強求。現時手持22,980點沽的淡倉，以及23,200點的恒指期權馬鞍式期權短倉，博結算價接近23,000點，賺取快速收縮的時間溢價，上周五套裝期權金縮至704點子。

美股上周五變動唔大，今日期指有機會開22,650點至22,750點之間，手上淡倉會以22,820點作為止賺。技術走勢上，恒指今浪見22,265點機會仲係五五之比。筆者不打算賭到除夕收爐，會以22,600點樓下作為平倉目標。當然，如果期指一旦跌穿筆者的期權沽倉打和點22,382點，屆時或需要作另外的沽倉作對沖。