股海實戰：雨潤食品估值有支持

美國上周公布的經濟數據表現偏好，延長減稅措施亦順利獲國會通過，惟上周五美股呈個別發展，主要是醫藥股偏軟，且跟港股及A股一樣，大市交投淡靜，魚缸人氣低迷。

早前政府針對樓市出招，初期樓市確實靜咗落嚟，但最近又見轉活，股市會否翻生，過埋新年就自有分曉。魚缸金魚有水則活，係投資者也好，投機者也好，身處一生人唔會多見的超低息年代，唔跟風炒作對唔住自己，最重要幾時入市都應該量力而為，唔好話輸打贏要啦﹗

本周聖誕假期將至，相信市況會更加淡靜。阿莊認識嘅大小炒家同大行分析員，大部分已經出埠或收爐。喺市況缺乏承接下，月底前恒指回落至22,000點亦不足奇。

喺內地提供高端嬰兒營養品及護理用品嘅合生元（01112），上周五首日掛牌，股價收報10.44元，較招股價11元跌5%。另外，大唐新能源（01798）H股首日掛牌，收報2.19元，較招股價2.33元低6%。睇見呢期新股首日掛牌表現，回想最近個別準新股臨門擱置上市，似乎係明智之舉。

券商估計，到咗二○一三年，內地將有約八成人口年收入超過3,000美元，品牌消費品市場發展潛力優厚。針對食品消費，經歷過多次食品安全事件，加上居民收入普遍上升，消費者更加重視食品質素。

但值得留意的是，正因為無論係政府抑或消費者都更加重視食品安全，這使得食品行業嘅生產水平及產品質素均要全面提升，製造商無可避免遇上成本上升嘅問題。產銷網絡擁有規模效益以及品牌優勢嘅龍頭企業，可以將成本轉嫁消費者，坐收漁人之利。

食品消費持續看漲

喺肉製品行業之中，雨潤食品（01068）可謂手執牛耳。講開又講，雨潤主要競爭對手深圳A股雙匯發展（000895），上月底推出一份規模龐大嘅資產重組方案，包括注入339億元人民幣肉類加工資產，實現肉類加工業務整體上市。消息公布後，雙匯股價飆升，惟基金有意見，結果上周公司修訂咗注資方案，下周一將進行審議。若然雙匯今次注資順利獲得通過，競爭實力將增強。展望未來，食品消費市場保持較快增長，相信市場可容納「兩虎」和平共處。之不過，雨潤除咗會繼續積極擴產外，亦會認真考慮加快購併步伐，以提升競爭力。

至於市場關注生豬價格持續回升，最近摩通亦指出，市場有點過慮，並認為雨潤每噸豬肉毛利可維持穩定。以雨潤上周五收市價計，明年市盈率約二十六倍。以未來三年核心盈利複合年增長率逾兩成嚟睇，估值具支持，可以趁淡市分注收集，揸兩、三季，目標價33元，穿23.5元止蝕。

戰報

巨騰國際（03336）

Sammi本月十日建議買入巨騰博反彈，當日低位3.15元，上周五股價高見3.47元，累積升幅逾10%。

中盈國金（00766）

志強上周五推介的中盈國金，股價顯著做好，並高見0.51元，以低位0.465元計，單日升幅有9.6%。