期指攻略：按計劃追沽 目標22500
前日大市低成交反彈，收市前十多分鐘突然掃高，挾倉味道高於一切，到尋日評級機構穆迪將西班牙主權評級列入觀察名單，消息猶如照妖鏡，港股的假強勢立即現晒形，恒指一跌就455點，23,000點失守，收報22,975點，跌市成交不跌反升，去到724億元，較前日多兩成六。
睇番西班牙主權債務信貸違約掉期（CDS），只係輕微擴闊去到330點子樓上，同上半年「歐豬」危機時比較，濕濕碎，港股如斯反應，說穿了是買賣兩閒多日，好淡雙方都無進攻藉口，今次正好借題發揮，將大市推落23,000點支持樓下。尤其是，恒指由24,988點跌到22,785點，多日來市況雖然穩定落嚟，但就係無法重返0.382跌幅阻力23,625點樓上，早就反映基金入市興趣奇低，估計大市有機會下試22,300至22,500的下一個支持區。
期權短倉錄得盈利
尋日午市現貨跌穿23,000點，筆者於是按計劃於22,960追沽，與收市價頗接近，筆者暫訂23,120止蝕。等了多日，終於等到破位才入市，假如未來幾日期指又重返23,000樓上，只能認命再一次跌入走勢陷阱。尚幸，手上23,200點馬鞍式期權短倉，收市價計套裝期權金跌到668點，帳面有150點利潤作緩衝，變相對沖了期指沽倉的可能損失。
