Fundman睇市：通脹周期搵國企贏家

周一、二港股走勢仲令唔少人有一點憧憬，殊不知尋日打回原形，露出「底子差」的本性，穆迪投資將西班牙政府主權評級列入觀察名單，未來有可能下調，對港股直接影響有幾大？相信唔需要跌2%吧！不過淡友有理無理，趁消息在年底前踩多港股一腳，23,000點終於失守，全日跌455點，報收22,975點，跌市成交不跌反升，去到724億，比前日的580億元多兩成六，唔係太好兆頭。

由技術走勢，港股十一月初在24,988點見頂，跌落最低22,785點，共跌2,203點，隨後反彈，一直未能重返跌幅0.382阻力23,625點樓上收市，反映24,988點開始的調整浪，好有可能未完成，一旦再穿22,785點，最低消費係低見22,265點。但即使係咁，講緊嘅亦只係幾百點，筆者中線未敢睇得太淡。

自八月中美國聯儲局主席伯南克話有二輪量化寬鬆（QE2），動用5,000億美元（估計每個月介乎350億至650億美元）入市買美債，以壓低中長期利率，協助經濟復甦，睇番十年期美債十月初在2.4厘見底，之後矮仔上樓梯升足兩個月，執筆時已去到3.49厘，較低位回升超過1厘，QE2不單無使債息回落，仲升得幾快吓。

港股明年回勇可期

當然，3.49厘同十年期債券長期平均大約4厘比較，唔算高，而且聯儲局要水浸股市同樓市，製造資產泡沫去救經濟的意圖，已是路人皆知，激發通脹乃遲早的事，既然有買家掃債掃得咁出力，自然唔使客氣沽畀佢套現，資金沽債取股已成趨勢，估計亦係近期美股屢創海嘯後新高的背後原動力，港股仲要示人以弱幾耐？筆者估最多一頭半個月，當明年初內地新一年貸款額度出籠，中資機構頭寸變得輕鬆，25,000點應該可以好快重現。

說到揀邊類股票，反而更令人頭痛，在高通脹、中央價格管制、貸款質素改善空間有限等因素影響下，筆者喜歡的食品股、資源股及內銀股都有瑕疵。筆者並無測市水晶球，惟有信歷史，上一次內地通脹周期，由○六年三月到○八年二月（合共23個月），通脹率由0.8%去到最高的8.7%，期間國企指數表現極佳，由6,506點升到14,039點，升幅115%，國指成分股中，能夠跑贏國指的依次係中國遠洋（01919）升597%、紫金（02899）升470%、安徽海螺（00914）升448%、江銅（00358）升312%、中海油服（02883）升289%、中海發展（01138）升276%、鞍鋼（00347）升276%、國壽（02628）升259%、神華（01088）升247%，平保（02318）升239%、財險（02328）升221%、中航（00753）升168%、青島啤（00168）升130%。

今次通脹上升周期始於○九年七月，至今十七個月，發改委話今年底明年初通脹見頂，時間上看來同上次時間相當脗合，無奈是，今浪國指只係升14.8%，同上次差得遠。

保險航運股大落後

上次通脹期跑出的股份，覆蓋行業眾多，其中較明顯的是保險及航運股，但上次表現優異，今浪卻是大大落後。進入高通脹尾聲（當然唔代表回落），會唔會有追落後的情況，從海運需求開始谷底反彈，加上中國肯定進入加息周期，機會看來唔細。另外，內房佔國指成分極微，這板塊明顯也嚴重被忽視，筆者估中資股一一年之星，應以在這三個行業內發掘。