股海實戰：德昌電機踏入復甦周期

美國聯儲局一如預期維持息率不變，十一月零售銷售數據勝於預期，並帶動美股前晚高收，還以為港股會順勢走高，誰知恒指低開低走，午後傳來穆迪或降西班牙評級嘅消息，淡友乘機發功，大市跌勢加劇，恒指最多跌554點，收報22,975點，跌455點，大市成交增至724億元。

本來市場一直擔心美國十一月份零售銷售數據，誰知結果優於預期，但港股反而掉頭向下行，真係估佢唔到。基本上，目前恒指仍處於22,800至23,500點波幅區，守得住22,800點，會繼續喺呢個區域炒上落。

昨日掛牌嘅新股世達科技（01282）雖然遇上跌市，但股價算係撐得住，全日高位1.04元，收報0.96元，較招股價0.95元微升1%。嚟緊趕住坐尾班車嘅新股，較大晒士有本周五掛牌嘅大唐新能源（01798）及下周四掛牌嘅中聯重科（01157），個人對前者表現期望唔大，反而後者有富豪入大飛，可以留意首日掛牌表現。

內地廣泛地區受寒流吹襲，吉林省氣溫跌到零下三十度，北京零下十一度，嚟緊兩日寒風吹到落嚟廣東，又令阿莊諗起專做羽絨等禦寒服裝產品嘅波司登（03998），最近該股有股東配股套現，受消息影響，前日股價下跌，但昨日已止跌回升，且看今趟冷風能否轉化為「東風」，將其股價推上4元邊！

展望明年全球經濟走向，除咗睇內地宏觀經濟政策取向之外，查實嚟緊美國聯儲局開始推QE2，向市場泵水刺激經濟，能否令疲弱嘅經濟翻生，亦係重要因素之一。

中期業績表現理想

美國市場佔整體收入比重近兩成嘅德昌電機（00179），上月底宣布截至今年九月底止中期業績，營業額同比增長27%，至10.3億美元，毛利率上升2.1個百分點，至28.7%，純利9,288萬美元，同比增幅5.3倍，中期息每股0.39美仙，證明公司盈利已開始復甦。

業績理想，除了美國及歐洲市場銷售回升之外，中港地區銷售額顯著增加，亦提供增長動力來源。期內，中港市場收入同比增長達三成，佔總收入比重最大達30%，顯見公司專營嘅汽車配件產品，受益於內地汽車產業優惠政策；同時，近年公司積極實施降低成本項目及重組措施已大致完成，效益將逐步展現喺業績上。

雖然今年內地汽車產業部分優惠政策或終止，但相信內地汽車銷售仍可保持穩定，加上採用國產零部件比例上升係大勢所趨，而美國市場復甦亦可期，難怪大股東六月以來多次入市增持。趁近期市況調整，可以留意低吸機會，較理想係等回落至5.1至5.3元區域進場，目標6.5元，向下50日線支持在4.8元。

戰報

中港照相（01123）

上周三姚午齊指中港照相攻守兼備，當日低位0.79元，昨日股價逆市創0.99元一年高位，累積升幅25.3%。

熔盛重工（01101）

冼金基上周五建議低吸熔盛，昨日股價逆市做好，並一度高見7.57元，累積升幅8.1%，果然眼光夠準。