太子手記：查懋成公子東瀛搵樓買

華資企業仍保留傳統，希望將盤生意一代一代傳落去，近期不少富二代、富三代開始跑出。太子尋日見到一段有關日本物業投資嘅分析，見到喺今年九月至成為香港興業（00480）執行董事嘅查燿中（Benjamin），大談喺日本投資物業嘅意見，聽落都講得有板有眼。

Benjamin今年三十六歲，係香港興業副主席查懋成個仔，為人低調。佢最近就喺日本搵投資機會，Benjamin話相比歐美投資者，亞洲投資者就水頭充足得多。

好似佢哋公司咁，早前至將荃灣愉景新城商場及1,000個停車場車位嘅餘下50%權益，賣咗畀partner新世界（00017），袋番13.782億元。

佢哋對日本嘅物業市場一啲都唔陌生，近年香港興業喺日本已經有唔少投資項目，好似喺今年七月，就公布過會收購日本東京港區六本木一幢住宅樓宇，大約要3.08億元，仲係以現金支付添。今次由Benjamin再去勘察，公司資本充足，今次應該係無寶不落。

日本樓市平穩價吸引

點解佢哋咁鍾情日本物業？Benjamin畀咗少少貼士，以日本住宅市場為例，收益率非常穩定，而內地同埋香港嘅增長波動性較高，日本相對定價有吸引力，內地市場有波動，政策因素無人估到。Benjamin相信由亞洲投資者主導嘅市場，會保持一段時間。

另外，根據聯交所資料，受益人為查氏家族嘅CMM Trust，旗下持股52.24%嘅CDW盡沽香港興業5.36%股權，令CMM同埋一眾查氏家族成員包括查燿中喺香港興業嘅持股量下跌，不過另一受益人同為查氏家族嘅股東LBJ，喺香港興業嘅股權就由6.41%增至7.88%。