Fundman睇市：中行估值低殘可博反彈

十一月內地通脹升到5.1%，人人都諗如何解讀這個數據，發改委大員驚市場諗多咗，自己嚇自己，於是安撫市場話十一月通脹或者經已見頂。看官或者都會覺得這番言論熟口熟面，非善忘的相信還記得，發改委年中時，也有過類似言論，當時揚言內地通脹秋季將會回落，然而，睇見人行仲差十多日過年都等唔切，要急急作出年內第六度加存款準備金率的決定，話通脹受到控制，筆者打死都唔信！

A股強勢，滬綜指尋日掃到接近高位收市，升81點，報2,922點，重返50日線2,920點樓上。尋日留意到，內地券商對加存款準備金率而唔加息，認為係人行對明年第一季通脹回落有信心，唔需要咁快落重藥咁話。

美銀美林認為，唔加息同人行已經勒令內地銀行限制十二月份貸款數字有關，估計月來新增貸款只係得3,500億元（人民幣．下同），即使加存款準備金率所凍結金額不過1,570億元，未及上次3,500億元的一半，已經對流動性管理有足夠力度咁話。該行估計明年底前，人行將有三次、每次幅度為25點子的加息機會。

尋日港股反彈力之弱令人失望，恒指升154點，報23,317點，午市滬綜指愈挾愈高，但港股依然故我，無辦法重上早市的23,490點高位，成交更縮到十二月份最低紀錄，只得633億元。

港股短線憂喜參半

其實，睇番上星期美股三大指數，標普五百及納指都創海嘯後新高，道指亦只係差41點就破頂，大環境有利港股搶高，可惜臨近聖誕，基金經理陸續放假去，成交唔夠，好友都惡唔出樣。未知看官有否留意，近日港元兌美元有陰陰跌情況，由十一月初的7.75強方兌換保證水平，跌番去執筆時的7.7778，乃九月初以來最低，資金流出（或者係熱錢減少流入）的情況相當明顯，總結港股短期走勢，係樂觀中存有隱憂。

中資銀行陸續完成供股，中行（03988）H股供股獲2.97倍超額認購，股價反彈0.05元，報4.16元。

近期中資銀行股走勢嚴重積弱，以中行為例，高位4.88元插到最低見過4.06元，以昨收市價計仲跌緊14.7%，比恒指高位至今累積跌幅6.6%大一倍有多。基金睇淡內銀股，主要針對一些長遠的睇法，包括擔心貸款質素改善周期近尾聲，呆壞帳佔貸款比例再跌空間唔大，而且亦憂慮明年新增貸款增長速度，在人行閂水喉下將放緩。

預期市盈率僅8.7倍

中行一一年預期市盈率得8.7倍，比歷史估值中位數10.5倍折讓一成八，目前的估值，反映市場期待未來兩三年的盈利增長率只得5至10%，明顯是相當悲觀的假設。

如果由炒賣角度觀之，筆者相信中行技術反彈應該好快出現，十一月中至十一月底供股除權前後，中行經歷過持續近兩星期的龐大沽空期，最高峰試過單日沽空佔全日成交額兩成八，對上一次出現這程度的沽空，已是○九年初，美國次按海嘯市場最恐慌之時候，試過沽空佔全日成交三成八！

股神巴菲特講過，「人家貪婪時你要小心，人家小心時你要學懂貪婪」，大多基金經理都對內銀抱悲觀心態，現估值較歷史估值存有相當足夠折讓，加上累積沽空盤唔細，三個因素之下，中行近期股價在4.1元附近有跌唔落之勢，尤其A股已蠢蠢欲動，出現快速挾倉絕對唔令人意外。