太子手記：洪丕正趁聖誕抖抖氣
臨近聖誕，又係賓卡出門享受深冬嘅日子。今年銀行公會主席兼渣打香港行政總裁洪丕正（Ben）為咗業界勞心勞力，剩係為人民幣業務開嘅會都數唔晒，年尾當然都要抖吓氣，太子聽講佢今個月二十日就會飛去一啲滑雪勝地陪屋企人。
陪家人滑雪度假
聽講Ben定咗個「框架目標」，但係仲未諗實去邊，最大機會係去日本北海道，因為無太大時差，可以玩盡啲，啲嘢又好食，如果有多啲時間，就會去歐洲或者北美洲，甚至加拿大嘅威士拿，共通點就係全部都係滑雪勝地。
不過，Ben話去歐美滑雪場，山上餐廳唔係漢堡包就係熱狗，唯一係有次喺法國山上餐廳，飲咗三盅由白、黃、紅洋葱煮成嘅湯，令人有驚喜。法國人屬歐洲最講究飲食嘅國家嘅講法真係名不虛傳。
銀行家忙到無時間放假係閒事，不過Ben話無論佢幾忙都好，盡量會喺聖誕節、復活節同暑假陪屋企人去吓短途旅行，果然身體力行支持渣打香港主張工作生活平衡。