樓市半年復旺難矣！

過去一個禮拜，樓市似乎稍有起色，幾位董事級代理朋友同Paul少報料，都異口同聲話，呢幾日啲大型屋苑嘅成交以倍數計，睇個市有機會喺聖誕節之前正常番啲。不過，大家唔好忘記，所謂「倍升」，其實係因為十一月底時，市場驚惶失措，所以成交嘅「基數」好低，有好多屋苑喺全個禮拜都「食白果」，所以到最近先至會有咁嘅「亮麗」表現。其實，依家市場嘅成交量，同政府出手前相比，仍然差好遠，但起碼已經畀到一個訊號出嚟，就係買家對後市唔會有過分嘅憂慮。事實上，經濟向好，加上低息環境持續，樓市嘅大趨勢仍然向上，只不過依家受到人為嘅干預調控，大家都係喺十里迷霧當中，自然一時間個心會怯一怯。

炒家走晒 換樓客減

見到近期嘅反彈，好多代理朋友同埋一些分析員，都樂觀地預測樓市嘅交投，可以喺農曆新年之後嘅小陽春期間，重現今年中嘅旺勢。但係Paul少就諗得比較審慎，始終喺未來一年半載裏面，市場一定會少咗兩類客源，包括炒家同埋上車唔夠兩年就想升級嘅換樓客，而其他客源又冇乜迹象會突然增加，去彌補當中嘅流失，更加睇唔到會有新類別嘅客源出現（除非政府突然又話搞置業資助喇），咁嚟睇，樓市交投根本冇可能回復舊觀。Paul少相信，未來半年交投充其量都只係可以去番高峰期嘅六成左右。

講開預測，Paul少忍唔住都要喺度講吓。最近有個舊街坊，攞住份某iBank分析員嘅樓市預測報告嚟搵Paul少，問Paul少點睇？又問Paul少明年樓市係唔係好似報告咁講，可以再升20%？係唔係應該跟入市？如果可以拍心口咁話到畀你聽，明年樓市會升幾多嘅話，Paul少呢個專欄就應該改名做樓市水晶球喇。

樓市分析 宜作參考

至於啲iBank分析員點解可以咁肯定話畀你聽，明年樓市仲有幾多「水位」，Paul少就只能講一句：「佢哋叻囉！」

其實，好多呢一類分析員，對樓市運作同埋真象往往只係一知半解，只靠地產代理提供一啲宏觀數據畀佢哋，然後整理一下就出嚟發表樓市報告，講到尾最重要都係想推介地產股，佢哋旨在sell「願景」，即係vision，個市實際發展係點，根本唔係主要討論嘅課題，所以有心置業嘅人士，對呢一類報告最好都係參考一下就算，唔好見間iBank個名夠響，就信到十足十，買樓始終係要靠自己親身「落場」做吓功課至得。