短炒倉：橙天嘉禾 走勢回勇
雖然離聖誕仲有成兩個幾禮拜，但呢幾日個市已經完全被假期氣氛所籠罩，交投疏落之餘，想搵較有鑊氣嘅股仔亦都唔容易。
志強日前推介過嘅美亞娛樂（00391），雖然暫時仍未發力，但同樣係電影業概念嘅橙天嘉禾（01132），尋日就見做好，最高升至0.63元，收市報0.61元，升幅逾3%。
橙天嘉禾股價早喺上星期已有動作，由0.52元水平升至最高0.73元，之後回落整固，尋日在集團宣布出售旗下泛亞華影廣告及泛亞影院廣告後回升，看來調整已告一段落。
事實上，集團近年積極拓展內地電影院業務，目前在內地共有4間影院合共32間影廳，且已取得理想成績，截至今年九月底止的首三季純利增長達1.05倍，至3,900萬元。隨着節日黃金檔期來臨，相信集團的電影票房收入可進一步增加，全年業績表現值得憧憬，不妨跟進炒一轉，目標0.78元，止蝕0.56元。
