期指攻略：期權短倉 博波幅收窄
尋日港股完全被假期前夕的氣氛籠罩，大市成交跌到十二月以來最低，得702億元，恒指升79點，報23,171點，收市計波幅得186點，也是過去五日最低，充滿着歲晚收爐的味道。
仲有十四個交易日，十二月期指就要結算，如果扣除平安夜及除夕，實際得十三日，大市成交相信會繼續往下走，買賣兩閒之下，測市的準繩度相對會降低，筆者只會堅持除非升穿23,867點，或下破23,000點支持才跟勢入市，否則，提早收爐亦都無妨。
不過，如果仲係想趁年假前搵番份聖誕禮物，可以一個馬鞍式期權短倉，博大市波幅繼續收窄，同時沽出23,200點的認沽及認購期權，在時間溢價損耗中獲利，昨日收市價計，分別是382及436點子，沽家收818點期權金，只要月底結算價介乎22,382至24,018，都可獲利（最大利潤是23,200結算，賺盡818點），一旦跌出這範圍，筆者會透過揸或沽期指進行對沖。
