Fundman睇市：恒指估值低難掀大跌浪

十二月只係過咗三分之一，但港股歲晚收爐的情況已經十分明顯，尋日恒指全日高低位，在早上十一時左右已經先後出現，之後大部分時間窄幅上落，比較特別係滬綜指以接近低位收市，跌37點，報2,810點，作勢跌出近幾星期2,800至2,900點的橫行區，可是港股一樣反應唔大，收市升79點，報23,171點，主板成交僅過700億元，係十二月以來最低。

國家統計局提前在周六公布通脹數字，加埋中央經濟工作會議召開，人行會唔會趁周末加息，睇情況係五五波，相信掛個勇字衝入市嘅人應該唔多，倒不如花時間揀吓聖誕禮物送畀親朋好友，會比睇住個悶市瞌眼瞓好。

愈近聖誕新年長假，相信大市交投會愈趨淡靜。技術走勢睇，恒指今次反彈無法挑戰十月中高位23,866點，破壞逐漸成形的頭肩頂調整訊號，八月至今的升浪，有迹象同大家講拜拜。不過，係咪盡信走勢到十足，認定跌穿22,785點頸線，要殺多兩千幾點去番20,582點？筆者未去到咁淡，第一係大跌市通常跟住大升市而來，港股今年其實幾乎係原地踏步，年初至今計只係升5.9%，平淡的市況下，出現大跌市機會唔大。況且，一一年市盈率十三至十四倍，息口展望仲有排企喺零水平，藍籌平均有2.6厘股息回報，息差幾乎是近年最闊，要掀起一次大跌市亦都唔易，即使有較利淡的消息拖累，史提芬相信最壞情況，跌到22,000點經已好足夠。

基金掃入金融股

尋日幾隻金融股出現罕見的掃貨熱，瑞銀睇好保誠（02378），將股份放入Key Calls名單，股價急升7.2%，連帶宏利（00945）都炒埋一份，升5.3%。

渣打集團（02888）發通告，指今年業務表現強勁，預告收入及盈利會雙雙破紀錄，雖然淨息差會由○九年水平稍為下降，但消息仍刺激股價升2.8%或者6.2元，報228.6元。渣打指今年無論零售銀行及批發銀行業務稅前溢利，都錄得雙位數增長，流動資金維持強勁，撥備亦有所改善，根基處於極佳狀況。

預告盈利破紀錄

通告無特別提供實質數據，但可以回顧上半年數字，淨利息收入升12.3%及非利息收入減少11.5%，分別是41.55億元及37.69億元，純利則升至21.48億美元（下同），升11.1%，對比○九年下半年基數較低的業績，14.47億元盈利，同比升幅達48.4%。綜合市場預測，估下半年賺22.11億元，令全年盈利去到43.59億元的破紀錄水平，比去年增長28.9%。

要渣打一一年之後繼續交出每年兩成多三成的增長，或者有點苛刻，可是對比滙控（00005），渣打主攻新興市場及中東一帶，避過金融海嘯重災區的美國及歐洲市場。綜合市場估計，一一年有一成五至兩成增長，對比估值約14.8倍左右，相當合理。即使吸引力不及年初時，但肯定當唔少國際級銀行仍然在收拾金融海嘯爛攤子時，渣打的理想增長是難能可貴，相信明年股價有機會見240至250元水平，連同股息，今時今日已屬相當理想的回報。