美經濟慘情全民皆輸

踏入十二月，又係時候為過去一年的人、物、事作出總結。據財經頻道CNBC公布的二○一○年贏家輸家榜，今年可謂輸家當道，由美國總統奧巴馬到英國石油（BP）前行政總裁海沃德，以至歐洲經濟及貨幣聯盟皆無一幸免，社交網站Facebook創辦人朱克伯格則成為少數贏家之一。

今次係CNBC第二年搞贏家輸家榜，由讀者以投票決定成王敗寇。唔知係唔係今年發生嘅政經大事多令人沮喪，受到美國失業率高企、斷供收樓潮不斷、債務和財赤嚴重，以及戰爭等因素影響，包括美國業主、納稅人及工人都慘成輸家，可以講輸家無處不在。經濟差拖累奧巴馬民望，最終以75%票數當選輸家。

美國經濟慘情，歐洲也不好過，自歐債危機爆發，暴露歐洲經濟及貨幣聯盟嘅缺點，順理成章淪為輸家。值得注意嘅係，喺貨幣戰嘅紛爭下，連匯率自由浮動嘅貨幣亦變輸家。

Fb朱克伯格成大贏家

贏家方面，Facebook（Fb）的朱克伯格即使被電影「唱衰」，贏家地位仍穩如泰山。反觀「話題人物」聯儲局主席伯南克，今年推行第二輪量化寬鬆措施（QE2），其「功績」是好是壞令人難以抉擇，難怪贏家票及輸家票分別佔46%及39%，只能以些微差距躋身贏家之列。