期指攻略：按兵不動 靜待方向

真係唔明？點解定咗時間公布嘅經濟數據，經常因為似是而非的理由改期，有人話，咁做可以畀多一個周末讓市場消化，反應無咁激烈，但講到底，市場早幾日開始驚，條數一樣咁計。

國統局提前在周六公布十一月份內地通脹數字，中港兩地股市驚會進一步拋離中央全年3%的目標，去到接近5%全年高位，逼人行年底前再加一次息以壓抑通脹，港股周二的反彈亦因此化為烏有。

本來前日升市成交額已稍嫌不足，技術走勢上，也未能順勢重返20日及50日線上，升得嚟有缺點，勢估唔到一跌就跌凸。觀乎昨日市底承接力之薄弱，自早市去到下午三點半前，好友幾乎完全無反攻的動力，的確令睇好後市者相當失望。相比之下，滬綜指跌幅比港股輕微，指數亦未去到2,800至2,900點橫行區的下限，港股明顯較弱。

上破23867難度高

進入假期倒數階段，除非中央經濟會議有意外事情，例如中央認為短期通脹已受到控制，並不急於加息等，當然，照目前情況，這機會應低於五成，這亦令到大市要攻破23,867點，破壞頭肩頂的右肩阻力的難度大增。

昨日現貨跌到22,998點掉頭，抽上23,092點收市，令跌破23,000點收市追沽的計劃，只能按兵不動，筆者堅持認為，一日大市唔突破上阻力23,867點，又或者跌穿23,000點支持位，未脫上落市格局，做好做淡皆不宜。