輪后蔡秀虹義工結良緣
輪場嘅喜事真係一浪接一浪，睇嚟一眾輪迷又少咗個「女神」喇！事關今次要結婚嘅係「新一代輪后」法興環球股票產品部策略師蔡秀虹（Eva）。
周末出嫁筵開26席
佢揀咗今個禮拜六（即係十一日）筵開26席。太子原本想揭吓「通勝」，睇吓十一日係咪好日，點知Eva話自己個人雖然好傳統，但都冇擇日結婚。原因係佢真係好鍾意擺酒嗰間酒店，難得有場而又近年尾，就揀咗呢個星期六擺酒，仲特登請咗律師喺入席前證婚。
Eva同佢未來老公仔喺五年前做義工識嘅，因為搞活動而結緣，一年前就諗住結婚。
太子好奇點解拍咗兩年幾拖就決定結婚，Eva笑笑口答：「因為相處融洽。」真係好鬼Sweet！佢哋喺七月份已經買入愛巢，婚後會去澳洲度蜜月。
結婚當然係高興嘅事，但Eva話自己好擔心當日嘅氣氛同流程唔夠好，又驚安排令親友唔滿意。
不過，計太子話，Eva兩公婆工作咁忙都自己一腳踢，預備今次嘅婚宴，賓客一定Feel到你哋嘅誠意。喺度祝Eva同佢未來老公婚後甜甜蜜蜜！
法興蔡秀虹今個禮拜六會同男友拉埋天窗。