Fundman睇市：買金礦股好過揸實金

仲有三個星期，就要同一○年講拜拜，現時市場最感興趣的，是基金經理會提前歲晚收爐？抑或趁成交縮減來一個粉飾櫥窗？本來美國話要擴大QE2規模，歐洲央行亦不甘寂寞，話要推量化寬鬆刺激經濟，客觀環境有利股市，無奈中港兩地股市恍似與世無爭一樣，投資者對中央出手壓制通脹驚餐飽，限制了股市升幅。

未到聖誕，可是港股已經洋溢節日氣氛，恒指昨日受A股午市拗腰回升帶動，終於擺脫連續三日高開低收的劣勢，收市反彈190點，報23,428點，但成交跌到得732億元，是過去一個星期以來最低。中資銀行股超賣下反彈之外，只係得本地零售股較具睇頭。

剛剛有套熱爆電視劇，有場戲講述抗戰後百業俱廢，國民政府狂印銀紙令通脹失控，男女主角喺餐廳開飯要幾千萬埋單。今時今日，全世界政府都知道高通脹嘅恐怖，所以不少先進國家都有通脹目標概念，務求將通脹控制在1至3%之內。

商品市場炒風勁

不過，人無完美，經濟政策亦一樣，控制通脹從來知易行難，全球經濟一體，資金流動唔再受地域限制，美國今日要刺激通脹，振興就業而狂印銀紙，導致熱錢四圍走，由於天然資源有限，但銀紙卻可無限量供應，結果股市未升，商品價格已炒得火熱。睇番年初金價每安士才1,050美元左右，昨已攻上1,420美元樓上，改寫歷史高位；白銀仲厲害，升穿30美元，相比年初的15美元，翻了一番。相比之下，金礦股有落後之嫌，像內地龍頭股紫金礦業（02899），現價7.59元，仍比年初高位8.5元低一成一。

今年第二、三季紫金的股價表現一般，毫無疑問同礦山意外事故，引致污水滲漏事件有關。直到十月初，集團被判處銅礦污水滲漏事件罰款，遠低於市場估計，而整件事估計涉及的索償大約4,000萬元（人民幣．下同），對每季純利平均達12億元的紫金，影響其實唔大，股價開始見追落後。

紫金第三季賺11.4億元，同比升19%，但較第二季則跌21%，主要是受污水事件影響令產量減少，以及事故後成本增加所致。首三季純利38.47億元，同比升33%，第三季業績部分屬一次過損失，相信全年達到分析員預測純利50.57億元的機會仍大，尤其係第四季的實現金價，跟隨國際金價高於首三季的大前提下。

紫金估值存折讓

股市永遠有一批死硬派人士，認為滲漏對紫金即使無永久性的經營成本影響，亦會對商譽溢價造成一定程度的負面衝擊。之不過，近幾年無論炒外匯衍生工具輸鑊勁，抑或涉及民生的毒奶事件，只要公司之後盤數夠靚，市場也樂於「集體失憶」。史提芬相信，這次污水事件只會影響紫金一時，唔會影響一世，既然一○年全年業績問題唔大，就以預期市盈率18.9倍計，比歷史平均值33倍，折讓四成二，即使打個七五折，以24.7倍計，股價都見9.9元，仲未考慮金價高位企穩，進一步拉動實現金價的可能性。與其走去金舖買金保值，倒不如分散注碼，入番手金礦股仲好。