太子手記：余錦基再培訓收穫大
漢傳媒（00491）幾名前董事包括人稱主席嘅余錦基、余錦遠、王日祥（導演王晶）等早前被聯交所譴責，話佢哋違反上市規則，聯交所仲要佢哋參加有關遵守上市規則、董事職責及企業管治事宜嘅培訓添，起初主席同太子講，佢都唔諗住再做上市公司董事，所以應該唔會上呢種合共二十四小時嘅再培訓課程，點知上個星期漢傳媒就公布話，呢幾名前董事已經乖乖咁完成晒個再培訓課程。
太子梗係要打個電話去向主席問個究竟啦，主席話原本佢真係無諗住上，但佢細佬（余錦遠）同晶哥都話上，所以咪柴娃娃一齊上囉。太子問個課程係咪好悶，點知主席話佢上完之後發覺個課程原來都幾有用，又話課堂中講師用咗好多生活例子講解，幫咗佢好多，真係活到老、學到老。
留港陪孫度聖誕
主席又講到今年唔會出埠過聖誕，皆因除咗佢媳婦年中生咗個男孫畀佢玩之外，最近佢位千金亦生咗男B，即係主席一年內多咗兩個男孫，有兩位男孫陪佢過聖誕，主席梗係邊度都唔想去啦。
余錦基話參與董事培訓學到唔少嘢。 （資料圖片）