李小加話熱錢唔使驚
港交所（00388）行政總裁李小加雖然曾喺美國留學，講得一口流利英語，但佢始終喺內地成長，又當過記者，中文水平非常高。佢尋日出席經濟峰會研討會，就引用咗一句成語「葉公好龍」來比喻市場對熱錢、人民幣國際化等嘅心態。
翻查字典，呢句成語係指古代一名人稱葉公嘅人士，平日好喜歡龍，家裏掛滿有龍圖案嘅擺設，但當有一日真龍探訪佢時，佢就好驚。
市場心態似「葉公好龍」
大家都知，依家市場最熱門話題係熱錢囤積在港伺機進入內地興風作浪，李小加引用呢句成語形容依家市場嘅心態，估計佢係指，熱錢、人民幣業務等，市場一向好有憧憬，但當熱錢一多，市場就開始擔心。
但佢就大派定心丸，話內地資本帳開放及人民幣走向全球係大勢所趨，呢個大方向係唔會咁容易有所動搖。
心繫人民幣發展嘅李小加都有輕鬆嘅時候。佢一向喜愛足球，最近佢就代表港交所，同深圳證券交易所踢足球，賽果係二比二，唔知兩個交易所真正較量時，係咪都係打成平手？