短炒倉：英皇鐘錶隨時開車
呢一輪成衣零售股嘅升勢真係唔講得笑，手上若然揸住JOYCE（00647）同堡獅龍（00592）之類，真係隨時瞓着都笑醒。想搵下一隻零售股嘅「明日之升」，志強認為英皇鐘錶（00887）值得留意。
睇番零售股炒起嘅理由，不外乎市道興旺、內地客來港消費、股價走勢落後等，呢幾點英皇鐘錶都有晒。內地豪客大量來港消費，珠寶鐘錶都係佢哋嘅重點「血拚」項目，英皇鐘錶當然受惠。集團今年上半年度盈利上升92.2%。而下半年度既有「十一」黃金周，仲有聖誕新年旺季，全年業績表現真係唔使擔心。
走勢上，英皇鐘錶上月股價持續整固，並無參與近期零售股嘅升浪，昨日微升0.01元，收報1.22元，似係蓄勢發力格局，相信不難突破1.38元前高位，目標睇1.45元，止蝕1.1元。
英皇鐘錶（00887） 目標價：1.45元 止蝕價：1.10元
