Fundman睇市：環球乳業執平貨博一博

近期內地揣測中央在經濟工作會議上，會針對樓市炒風落重藥。事實上，今年較早時間兩度出手，都收唔到預期效果，未能阻擋樓市升勢，市場就估計，中央今次會由緊縮信貸方面着手。筆者對行政手段干預樓市的成效，甚感懷疑（除非極端到限制樓宇轉售或者大幅提高物業轉售稅），事實中央唔鼓勵炒樓唔係新聞，第二、第三套房按揭早已限制多多，但仍無法壓抑內地人的置業興趣，說穿了，是內地通脹嚴重但息口卻太低，加上多年來經濟發展步速飛快，但資本市場發展卻未見配合，令民間積累的龐大資金苦無出路。

記得八十年代的日本，在經濟起飛、日圓大幅升值之後，都遇到相同的問題，當時日本政府積極疏導熱錢，擴大資本市場，令日本一躍成為全亞洲最大債市，以及全球第三大股票市場。反觀中國今日選擇攔截而非提供其他疏導途徑，要防止資產泡沫出現，必然是事倍功半。

港股終於打破悶局，在和黃（00013）及滙控（00005）帶動下，恒指收市升241點，報23,249點，是過去七日收市高位，亦重返10日平均線23,200點樓上。亞洲主要市場開始消化南北韓局勢消息，紛紛從谷底反彈，美匯指數去到81水平有見頂回落迹象，都有利港股扭轉弱勢。踏入十二月，唔少基金經理陸續放假，展望後市，相信亦會開始趨向淡靜。

零售股炒到出煙，而積弱多時嘅奶粉股，部分亦見反彈。環球乳業（01007）昨日升0.26元，收報3元，不過以周二做出的上市低位2.62元計，較上個月招股價4.39元跌咗四成，認購嘅股民真係輸間廠贏番粒糖。至於另外兩隻奶粉股，雅士利（01230）未有起色，逆市跌0.01元，報3.2元，較上個月招股價4.2元，仲潛緊水兩成四；而較早上市的澳優（01717），尋日升0.28元，收報3.12元，但係一睇年初高位6.85元，揸咗嘅唔知好嬲定好笑。

走出三聚氰胺陰影

三聚氰胺事件之後，內地乳品企業傷亡慘重，即使唔係為○八年的大型回收埋單，都要諗計重建消費者信心，包括改變原材料採購途徑，以及大量增加廣告開支。像環球乳業，上市集資主要希望控制上游原材料品質，自設乳場做到自給自足，隨着資金到位，集團剛在黑龍江五常市二河鄉興建奶牛牧場，養殖1萬頭奶牛，落成後年產4.2萬噸鮮奶及高達2萬噸生物有機肥。

有別於環球乳業，雅士利索性全面轉用外國進口原乳，主要是來自新西蘭，集資所得的23億元分成四份，除作為營運資金外，分別用於擴大廣東省產能、在海外建立垂直整合的生產設施，以及增加廣告推廣活動。至於澳優，蜜月期一過，中期業績即時走樣，看來需要觀察期，暫且當睇少一隻。

雅士利佔龍頭地位

三隻股票中，目前於內地以雅士利知名度最高，產品種類亦最廣，由低價至高價奶粉相當齊全，龍頭地位是當之無愧。有別於雅士利，環球乳業不見經傳，事實在內地奶粉市場佔有率不足2%，然而，幾年前公司收購華北老品牌「大慶牌」，用家口碑奇佳，投資者要押注的是一個地區品牌，能否達到風行全國的目標。

根據招股時的盈利預測，環球乳業今年市盈率11.9倍，雅士利19.1倍，估值差距反映基金對兩者評價的分別（後者○九年銷售額是前者五倍），但結合估值、未來兩年增長幅度、以及博反彈先檢平貨的賭徒心理，筆者傾向選環球乳業。