京官笑稱華創無法無天
華創（00291）首席財務官黎汝雄（Frank）話佢成日要出差，主要係返內地睇吓公司業務，同當地啲官員閒談時，啲官員竟然話華創畀人嘅印象係「無法無天」同埋「夜總會」咁。
無法定假 無星期天
Frank聽到好驚，心諗唔係呀，我哋好依法守規o架喎，係咪有咩誤會咁呢？官員笑笑口同佢講，喺華創做的確係「無法定假期，無星期天，老總成日喺三更半夜Call啲人去開會」。
聽到呢個解釋，Frank即刻鬆一口氣。佢都好認同，喺華創打工真係幾辛苦，好似思捷（00330）舊年出售合營公司股份單刁，佢哋成個總部嘅員工團隊，三日兩夜無瞓過覺，所以內地官員嘅睇法無錯o架。
做得咁辛苦公司梗係唔會虧待啲員工啦，舊年就請佢哋去日本大阪五天遊，今年仲加長到七日去北海道添。至於人工有無得加，佢就笑笑口話睇業績好唔好囉，咁即係十拿九穩啦。
華創首席財務官黎汝雄經常出差，返內地處理公司業務。（資料圖片）