金牌AE：超威動力估值吸引

上周二推介天能動力（00819），股價由當時嘅3.13元升至尋日嘅高位3.42元，表現較大市好得多。今日推介另一隻半新電池股超威動力（00951），現水平估值較天能仲要優勝，近日股價見底回升，值得趁機吸納，短期博衝破前高位3.48元，向4元水平推進。

超威係內地電動車市場領先嘅鉛酸動力電池製造商，其中鉛酸動力電池以收入計，佔內地市場份額18.3%，穩居行業龍頭。另外，超威亦生產風電同太陽能儲能電池，以及向吉利同江淮等汽車製造商，提供電動車所用嘅鉛酸電池產品。

二○一○年度（十二月結）上半年，超威營業額14.4億元（人民幣．下同），上升28.6%，盈利1.194億元（超過招股書預測嘅1.13億元），上升22.9%，每股獲利0.16元。

內地電動自行車已列入「家電下鄉」補貼項目，對超威嘅銷售更為有利，保守估計，全年盈利2.6億元，每股加權獲利0.3元（約0.35港元），預期市盈率7.8倍，以目標價4港元計，市盈率同天能相若，但較光宇國際（01043）嘅預期二十一倍折讓達45%。

超威動力（00951）　目標價：4.0元　止蝕價：3.0元