股海實戰：市場形勢利好華潤水泥

昨日港股受壓，恒指最多曾跌321點，收市險守23,000點，尾市十五分鐘大市成交明顯增加，全日成交達到1,015億元，主要係同大摩指數系列更換成分股有關，見新貴之一嘅華晨（01114）及波司登（03998），股價均有好表現。

人行貨幣政策委員李稻葵近日表示，為應付金融危機，過去兩年內地採取了寬鬆嘅金融貨幣政策，但隨着環境轉變，未來政策可能有變。值得可圈可點嘅係，李氏指出，未來五年中國喺金融領域一定會推出全方位嘅金融改革措施，包括擴大直接融資及股市嘅規模，同時降低對銀行貸款增長嘅依賴。

可以預期，推動內需嘅動力，將由側重於銀行新增貸款，轉移至直接投融及股市嘅資產增值效應。未來內銀股必須要加快開拓多元化嘅金融業務，才能保住盈利增速，而隨着股市蓬勃發展，內地券商股嘅前景可睇高一線。

中國燃氣業績失手

個股方面，中國燃氣（00384）最近宣布截至九月底止中期業績，純利大幅下降八成，至9,000多萬元，消息拖累股價下挫，昨日曾低見3.51元，收報3.97元，跌10.59%，成交達到9.38億元。阿莊亦持有此股，對於呢份中期業績表現亦頗感意外。

公司解釋，盈利下降乃受○六至○八年訂立數份利率合約嘅滯後影響，加上今年次季國際液化石油氣價飆升，增幅高於國際油價，而內地氣價又未有跟隨上調，致使喺內地銷售進口液化石油氣業務錄得逾億元虧損。惟公司強調，九月起內地氣價上調，十一月旗下進口液化石油氣銷售毛利率已大幅增加。

若非中燃亦為今次大摩指數系列調整嘅新貴，昨日股價跌幅可能更甚。講到底，信心經已受損，短線若有機會平手離場，會先行沽出。

限電減產推高售價

此外，受內地末季出現水泥荒嘅消息刺激，水泥股昨日逆市做好，安徽海螺（00914）升4.76%、中國建材（03323）升3%，而同屬今次大摩指數系列調整新貴嘅山水水泥（00691）及華潤水泥（01313）則分別升逾3%及6%。

促使近期水泥價格上升，主要係各省市年底前紛紛落實限電減產，直接影響水泥市場嘅供應量。潤泥管理層最近便表示，預期年低前水泥價格會持績高企，下半年毛利率可優於上半年。

老實講，中長期而言，內地水泥市場供大於求嘅格局未有改變，目前供應緊張係短期因素使然，但汰弱留強下，最終龍頭企業仍為大贏家。有鑑於此，短線借消息跟炒，穩陣起見仲係從龍頭股入手。未來兩年，潤泥產能均有所增加，喺華南嘅市佔率超過一成，有一定議價能力，估計今年可順利實現增產目標。

戰報

哈爾濱動力（01133）

上周三冼金基建議低吸哈動，當日低位10.46元，昨日高見11.72元，累計升幅12%。

+12%

威高股份（01173）

錢進尋日推介的威高，低開之後反覆走高，並高見0.53元，以低位0.44元計，單日升幅逾兩成。

+20%