太子手記： 鍾少權唔知Call爆機
近排打壓樓市措施一籮籮，唔少按揭部銀行家都要見招拆招，忙到抖唔到氣。星展香港客戶、存款及抵押貸款高級副總裁鍾少權（Derek）原來撞正當日毅行者開跑，但佢個電話就畀人Call爆咁滯。
撞正政府出招遏炒樓
太子聽聞，當日政府出招消息，唔少坐喺辦公室嘅銀行家都覺得意外。Derek當日正在參加毅行者比賽，好多人唔知佢跑毅行者，所以不斷搵佢研究政府新招會帶來乜嘢影響。Derek專心比賽，就梗係唔知咁多人搵佢啦。聽講佢星期一返到辦公室，發現個電話好似畀人Call到裂咗。
Derek話收到消息時，心情無咩特別，認為有適當調整係好事。
今年係Derek第二次跑毅行者，上年佢係畀人「臨時徵召」入隊，但係今年就唔同，佢早有準備。不過，佢話今年實在太忙，到最後都係唔夠時間練習，表現無上年咁好。毅行者一組四人，好講究團隊合作，Derek話今次成隊人經過第一晚比賽之後，愈戰愈勇，後期反而行得快咗，最後用三十幾個鐘成功跑畢全程。
鍾少權專心參與毅行者，平常心對待政府出招。 資料圖片