市場徐想：建行 懶人投資之選
上星期有幸出席陸東嘅投資慈善晚宴活動，順道一聽高人指點，正所謂「先求知，再投資」。
陸東最愛嘅內銀股─建行（00939），筆者早前都有提過，確實以依家中國銀行體系嘅安全度嚟睇，估值確係吸引。如果你真係好懶，買建行或者安碩A50（02823）啦，真係可以話係懶人股票投資法，但起碼叫做為咗對抗通脹去做番少少嘢。
另外，陸生睇好嘅港交所（00388）都要留意，單一大賭場，加上筆者之前講過嘅港交所二○一一策略，一定要留意。至於佢做咗非執董嘅TCL通訊（02618），佢話出任呢間公司呢個位，係因為公司有品牌、有技術、有銷售點，應該有睇頭，加上佢老哥預告咗會處女下海粉墨登場以「梁朝偉造型」做代言人，實在係勁揪！
以當前恒指走勢而言，24,195點係依家嘅阻力位，破到呢個位又可以向明年嘅高位進發。正如筆者所講，22,850點唔破，大方向仍然向上，繼續追蹤！