Fundman睇市：華寶估值高得有道理

港股結算日，淡友並無借美股上星期低收趕盡殺絕，午市結算價塵埃落定，挾倉活動立即出現，恒指由早市低位22,785點，挾到23,166點，接近全日高位收市，升288點，但成交得657億元，是接近兩個月以來最奀，話大市短期見底，似乎仲係言之尚早。

尋日，周生生（00116）被指內地分店出售18K白金手鏈含金量不足，有關消息曝光後，周生生股價急跌10.5%或者2.13元，報18.12元。據筆者所知，今次消息確實令唔少基金感意外，尤其周生生向來標榜內地分銷網絡全部以直營店形式開設，以保障銷售產品品質，咁都出事，難怪拖累幾隻金飾股通通由近日高位回吐。

暫時未見官方通告，回收K金手鏈影響多大？只可以客觀數字評估，○九年周生生內地銷售額18.75億元，佔全年總營業額94.6億元大約兩成，加上只係K金首飾，影響可能有限，但站在消費者立場，珠寶首飾銷售最講商譽及產品口碑，今次事件對周生生發展內地市場的衝擊，不是區區蒸發14億元市值咁簡單，要考考周生生管理層的危機處理及公關工作了。

話說回頭，今年零售股狂潮，周生生年初至今累升九成五，一○年預期市盈率十九倍（急跌前仲係21.3倍），比沙士後歷史平均的11.5倍高六成五，對不利消息的抵抗力自然低咗，可唔可以在18元搵到支持，要睇之後的補救工作做得如何。

提防JOYCE炒過龍

JOYCE（00647）尋日急升五成二或者0.32元，收報0.93元，與月內低位0.36元相比，翻了近兩番。這間專賣貴價時裝的名店，九月底止半年賺4,035萬元，大增九倍，這與去年盈利基數十分低有關，如果以一○年三月底止六個月的3,121萬比較，升29.3%。

已久未見大行為JOYCE撰寫報告，筆者即管粗略假設，下半年業績如果再升三成，全年賺9,300萬左右，以15.1億市值計，市盈率16.2倍，已經唔平，尤其睇真啲銷售額只係升6.5%，純利增長很主要是銷售存貨成本較低所致，到底係基金經理炒零售股炒到癲晒？抑或筆者太保守？在下都想知道答案，但去到逼近1元水平，真係要擔心音樂椅遊戲就快完。

中國最大香煙香料生產商華寶（00336）出成績表，半年賺7.52億元，按年升23.1%。以為內地擁有全球三分一煙民，華寶又佔全中國五成香煙香料份額，咁大隻，增長只能跟隨市場每年銷售升幅，難以有驚喜，結果卻令人感到有點意外，主要係因為公司除香煙外，亦有拓展食品、飲料及餐飲配料等產品，並且已開始收到效果所致。

行業龍頭地位穩固

早前華寶斥資11.5億元人民幣，收購廣東省金葉煙草薄片技術開發，直接涉足具備降焦優點的再造煙草市場，配合內地對香煙產品含焦油量監控的大趨勢，大行估計，雖然即時貢獻未必十分明顯，但有利華寶繼續保持在煙草香料市場的寡頭壟斷優勢。

華寶一一年市盈率24.8倍，估值唔算平，但過去五年平均市盈率都係24.9倍，可見基金對這行業龍頭長期捧場。據彭博資訊顯示，大股東連同持股最多的十六間基金公司（當中不乏富達、Wellington等長線互惠基金），揸咗七成八街貨。

○七年華寶高峰期曾經出現四十倍市盈率，筆者相信再次出現機會唔大，但以兩成五年增長，加上行業入門門檻奇高，想檢便宜貨的機會亦唔大，想買貨的，相信要等每次股市氣氛轉壞時。