會公執位兩雄相爭
一年一度嘅會計師公會理事會選舉就快到，將於十二月十七日舉行，現任兩名副會長周福安同蔡永忠，如想「再上一層樓」，坐正做會長，就先要過成功連任一關。
話說今屆理事會選舉，共有七名現任理事要卸任，包括周福安、蔡永忠、左龍佩蘭、岳思理、陳錦榮、鄒小磊、同Paul Winkleman，但按例可以再選。
會計師公會會長任期係一年，根據慣例，副會長好多時會升做會長，換言之，現任會長馮英偉今年底退任後，新一屆會長熱門人選係周福安同蔡永忠，但佢哋要坐正，必須先要成功連任。
周福安蔡永忠資深
周福安同蔡永忠兩人都係會計師公會嘅「老朋友」，周福安自○四年一月起已加入理事會，依家係思捷環球（00330）執行董事暨財務長。蔡永忠就係會計師行合夥人，自○四年十二月起已加入理事會。
雖然今次會計師公會理事會選舉同歷屆分別不大，但由於距離二○一二年立法會選舉唔係太遙遠，唔排除不少人已開始部署，為將來做準備。
周福安好有機會做下屆嘅會計師公會會長。 （資料圖片）