短炒倉：鱷魚恤 見1元冇難度
雖然上周中段有反彈，但港股始終未擺脫弱勢，上周五恒指再度失守23,000關，兼且成交縮到700億元唔夠。
淡市之下，資金繼續炒作細價股，本地時裝股再次成為目標，其中堡獅龍（00592）升6%，漢登（00448）升14.9%，而上周三急升逾兩成嘅鱷魚恤（00122），周四抖咗一日，周五又再嚟料，升13.3%，收報0.85元。
其實撇開資金炒作因素，單睇基本質素，鱷魚恤實在唔輸蝕。集團上年度錄得盈利1.63億元，增長14%，每股盈利26.49仙，市盈率仍然只係3.2倍，相對每股資產淨值1.45元，有多達四成折讓。睇番其他時裝股，PB閒閒哋一、兩倍，鱷魚恤可謂大落後。
就算唔同時裝股比，睇吓同樣由零售轉行做收租佬嘅永安（00289），目前NAV一樣有約四成折讓，但PE就有六倍，鱷魚恤就算用極保守嘅四倍計，已可見1元。
