Fundman睇市：堡獅龍有條件炒落後

港股近期走勢令人失望，上周五日累跌728點或者3.1%，單是周二南北韓互射炮彈當日就跌2.7%，是近六個月以來最大單日跌幅。講到尾，論財力、論軍力，筆者唔信北韓會輕易開戰，一來老大哥中國都唔想自己後園出事，而北韓相信亦唔會笨到畀藉口美國出手，港股咁弱，似乎同近期美元見底回升有較大的關連性，而且人行連環加存款準備金率及提早展開加息周期，以重手管理流動性及壓低通脹預期，市場已開始有反應，人民幣兌美元十二個月不交收合約（NDF），已跌至兩個月低位，由十月中高峰期的6.3915，縮番去6.5585，人仔升值預期降溫，直接令港股炒風冷咗一截。

上周末，美國公布感恩節後Black Friday零售銷售數字，只係麻麻哋，比去年同日升0.3%，話今日經濟遠離海嘯影響？看來是說不過去。展望今個星期，美國周五將公布十一月份就業數據，市場估失業率無改善，繼續維持喺9.6%，新增非農業就業職位就會有14萬份。

美債息有回升迹象

QE1唔掂再出QE2，到底對美國經濟有幾大貢獻？從近期零售業及就業數據，看來效果的確唔大。唯獨零息支持下，美國股市仲比海嘯低位高七成一，通脹預期開始返緊嚟，十年債息由早前低位的2.33厘升番到2.86厘。聯儲局講明低息期有排玩，以刺激投資去支持經濟復甦，控制通脹的任務已經無人再提，到底長期縱容高通脹低利率，會唔會救到今次百年一遇的經濟危機仲係後話，在政府都變相鼓勵洗腳唔抹腳，靠借度日，已變相懲罰咗一班辛勤工作賺錢儲蓄（鈔票購買力不斷下滑）的打工仔。

近期的跌市中，本地零售股是少數的逆市奇葩，這要多得近半年一直優於預期的零售銷售，加埋多隻零售股公布亮麗中期業績所致。但筆者懷疑，這類過往五至六倍PE無人吼，今日二十倍才人見人搶的零售股，有幾多基金儲夠貨底，能夠在今輪升浪中享受到成果。

零售股炒風繼續吹

由周生生（00116）、六福（00590）、 I.T（00999）等「晒士」有番咁上下，炒風最近蔓延到過往長期無成交的先施（00244）、先施錶行（00444），甚至鱷魚恤（00122），咪話唔得人驚。無奈的是，今日大市的確欠一個炒賣主題，零售股炒埋今個聖誕都唔出奇。

留意到本地零售股堡獅龍（00592）今浪升幅唔大，接近兩個月時間都在0.7至0.9元間浮沉，論估值，去年堡獅龍業績升八成，賺9,045萬元，市值13.3億元，市盈率14.7倍，比I.T及JOYCE（00647）的二十七至三十倍低一截，即使產品級數相若嘅漢登（00448），最近亦因為VP連番增持，股價短短一個月內翻一番，市盈率都去到接近十九倍。而過去兩年，堡獅龍更把派息比率提高到六成樓上，如果想搵隻落後零售股短炒，堡獅龍條件唔錯。